У дроне, які прыляцеў у Літву з Беларусі, знайшлі 2 кг выбухоўкі

Беспілотнік, які на мінулым тыдні прыляцеў у Літву з Беларусі і ўпаў на палігоне пад Каўнасам, нёс выбуховае прыстасаванне.

"Пры аглядзе апарата было выяўлена, што ён нёс выбуховае прыстасаванне, якое літоўскія вайсковыя спецыялісты паспяхова абясшкодзілі на месцы", — перадае LRT словы генеральнага пракурора Літвы Ніды Грунскене.

Начальнік штаба Ваенна-паветраных сіл палкоўнік Дайнюс Пашкявічус заявіў, што ў дроне выяўлена 2 кілаграмы выбухоўкі. Ён дадаў, што дрон накшталт "Шахеда", які мае падобную канструкцыю і мадэль, можа несці да 50 кілаграмаў выбухоўкі.

Як паведамлялася раней, дрон прыляцеў у Літву зранку 28 ліпеня. Яго пошукі працягваліся амаль цэлы тыдзень і завяршыліся толькі 1 жніўня: беспілотнік знайшлі на палігоне ў Ёнаўскім раёне.

Вайскоўцы мяркуюць, што гэты дрон, як і папярэдні, былі расійскімі і накіроўваліся для атакі Украіны. У Літве яны апынуліся пасля таго, як украінскія сродкі радыёэлектроннай барацьбы змянілі траекторыі іх палёту.

Пасля выяўлення выбухоўкі ў дроне міністры абароны і замежных спраў Літвы звярнуліся ў NATO з просьбай размясціць у краіне сістэмы абароны ад беспілотнікаў.

"Мы будзем прасіць абмеркаваць магчымасць размяшчэння ў Літве пэўных дадатковых — хай нават эксперыментальных — тэхналогій і пратэставаць іх у рэальных зменлівых умовах", — заявіла міністарка абароны Давіле Шакалене.