Трэба сыходзіць з таго, што Мельнікава ў руках рэжыму — Лябедзька

Шанцы на тое, што зніклая спікерка Каардынацыйнай рады Анжаліка Мельнікава знаходзіцца ў бяспецы, вельмі малыя. Так мяркуе дырэктар цэнтра "Еўрапейскі дыялог" Анатоль Лябедзька.

"Чаканні цуду ўжо прайшлі. Таму, хутчэй за ўсё, трэба сыходзіць з таго, што Анжаліка на тэрыторыі Беларусі, у каардынатах рэжыму Беларусі. І тут прыхільнікам пераменаў няма спадзявання на нейкія добрыя навіны", — заявіў ён у эфіры тэлеканала "Белсат".

Маўчанне рэжыму Лябедзька патлумачыў тым, што з Мельнікавай працуюць, каб яна пагадзілася на агучванне пэўных сцэнароў, падрыхтаваных лукашэнкаўскімі спецслужбамі. Магчыма, яна супраціўляецца, таму магла ўзнікнуць такая паўза. Ён заявіў, што мы знаходзімся ў стане вайны, а Мельнікава з'яўляецца "палітычным генералам" і яе знікненне дае рэжыму перавагі.

"Мельнікава можа быць важнай для рэжыму, каб спыніць працэс міграцыі беларусаў – актыўных, самадастатковых. І ім зараз можа быць патрэбна паказаць яе — менавіта як чалавека, які пакаяўся, вярнуўся ў Беларусь. І, канешне, многія могуць задумацца: ну, калі Мельнікава вярнулася на пэўных умовах, выканаўшы пэўныя нейкія абавязкі, то чаму я, шараговы воін, не магу гэта зрабіць?" — апісвае палітык магчымы сцэнар.

Пра знікненне спікеркі Каардынацыйнай рады Анжалікі Мельнікавай стала вядома 28 сакавіка. Кіраўнік Народнага антыкрызіснага ўпраўлення Павел Латушка расказаў, што былы муж Мельнікавай выехаў у Беларусь. Пазней стала вядома, што мабільнік Мельнікавай з 19 сакавіка фіксуецца на тэрыторыі Беларусі. Яе дакладнае месцазнаходжанне дагэтуль невядомае.