У польскіх праваахоўнікаў няма прыярытэтнай версіі наконт знікнення Мельнікавай

Месцазнаходжанне спікеркі Каардынацыйнай рады Анжалікі Мельнікавай на сёння польскія праваахоўнікі выявіць не здолелі. Пра гэта напісаў Павел Латушка ў сваім тг-канале.

Кіраўнік Народнага антыкрызіснага ўпраўлення сказаў, што сустракаўся з польскімі праваахоўнікамі 2 красавіка. "Паводле іх інфармацыі, месцазнаходжанне спікера Каардынацыйнай рады Анжалікі Мельнікавай на сённяшні дзень устанавіць не ўдалося. Прыярытэтнай версіі прычыны яе знікнення ў праваахоўных органаў няма", — паведаміў Латушка.

Пра знікненне спікеркі КР стала вядома 28 сакавіка. Павел Латушка заявіў, што сувязі з Мельнікавай няма з 25 сакавіка. Пазней стала вядома, што тэлефон спікеркі КР знаходзіцца ў Беларусі прынамсі з 19 сакавіка. Польскія праваахоўнікі сказалі, што яна пакінула краіну некалькі тыдняў таму. Паводле неафіцыйных звестак, жанчына магла вылецець у Вялікабрытанію.

Таксама стала вядома, што былы муж Мельнікавай ў другой палове сакавіка выехаў у Беларусь.

У пары ёсць дзве малалетнія дочкі. Пра іх месцазнаходжанне таксама нічога невядома.