Трамп не адмаўляецца ад ідэі стварэння сістэмы "Жалезны купал" над ЗША

Дональд Трамп не адмаўляецца ад ідэі стварэння сістэмы "Жалезны купал" над ЗША. Паспяховым прыкладам называецца сістэма супрацьракетнай абароны, якая выкарыстоўваецца Ізраілем для адбіцця знешніх паветраных атак. У панядзелак Трамп заявіў, што падпіша ўказ аб пачатку будаўніцтва ў Злучаных Штатах такой жа сістэмы. "Мы павінны неадкладна пачаць будаўніцтва сучаснага супрацьракетнага шчыта "Жалезны купал", які зможа абараніць амерыканцаў", — цытуе словы прэзідэнта ЗША "Голас Амерыкі".

Трамп абяцаў стварыць для Злучаных Штатаў аналаг ізраільскай сістэмы яшчэ падчас перадвыбарчай кампаніі. Эксперты звяртаюць увагу, што "Жалезны купал" прызначаны пераважна для перахопу ракет малой далёкасці, але ён малаэфектыўны для абароны ад міжкантынентальных ракет (а менавіта яны з'яўляюцца галоўнай пагрозай для ЗША).

Вядома, што "Жалезны купал" Ізраіль распрацаваў у супрацоўніцтве з ЗША. З 2011 года з яго дапамогай былі выяўленыя і перахопленыя тысячы ракет, запушчаныя ХАМАС і "Хезбалой". Ізраіль сцвярджае, што каэфіцыент паспяховасці працы сістэмы супрацьпаветранай абароны складае больш за 90%.