Толькі ў выпадку пагрозы жыццю: настаўнікам забаранілі карыстацца тэлефонамі

Настаўнікам у школах забаранілі карыстацца смартфонамі падчас урокаў. Першапачаткова аналагічная забарона была накіраваная на вучняў.

"Выкарыстанне педагагічнымі работнікамі ўстановы агульнай сярэдняй адукацыі прыладаў мабільнай сувязі (інтэрнэт-сувязі) падчас адукацыйнага працэсу не дапускаецца, за выключэннем выпадкаў узнікнення пагрозы жыццю ці здароўю навучэнцаў, работнікаў, іншых экстраных выпадкаў", — сказана ў свежай пастанове Міністэрства адукацыі, апублікаванай на pravo.by.

Раней Міністэрства адукацыі пастанавіла, што смартфонамі нельга карыстацца вучням. Больш за тое, дзеці павінныя будуць здаваць тэлефоны на ўваходзе ў школу. Самі ж установы адукацыі павінны абсталяваць спецыяльныя месцы для захоўвання прылад: індывідуальныя ячэйкі, кейсы для класаў, шафы або асобныя памяшканні, да якіх доступ кантралююць прызначаныя адказныя асобы.

Настаўнікаў здаваць гаджэт пры ўваходзе ў школу не абавяжуць. Але падгледзець ці ўдакладніць нешта па праграме ўрока ў смартфоне цяпер нельга.

Новыя правілы пачнуць дзейнічаць з 1 верасня.