Статкевіч мусіць быць вызвалены і камунікаваць з Мінска — Спарыш

Мікалай Статкевіч перад вызваленнем быў у вельмі добрым маральным стане. Пра гэта расказаў яго аднапартыец Сяргей Спарыш на прэс-канферэнцыі вызваленых палітвязняў у Вільні 12 верасня.

Паплечнік Статкевіча кажа, што ўчора апынуўся разам з ім у СІЗА КДБ і паспеў пагутарыць:

"Ён у вельмі добрым стане маральна, можа нават у лепшым, чым было ў 2020-м. Тады ён хваляваўся, ці здатныя беларусы на што-небудзь. І атрымылася нават вельмі няблага".

Паводле Спарыша, Статкевіч не баіцца наступстваў свайго вяртання ў Беларусь: "Ён сказаў што ў 90-я ўжо быў вельмі блізкі да смерці, і цяпер баяцца не варта".

Спарыш назваў Статкевіча маральным лідарам і заклікаў "не дзяліць скуру незабітага Лукашэнкі", а ўсімі магчымымі метадамі абараніць апазіцыйнага лідара: "Калі Трамп сказаў, што Статкевіч мусіць быць вызвалены — ён мусіць быць вызвалены і мусіць камунікаваць з вамі з Мінска".

11 верасня рэжым Лукашэнкі па дамоўленасці з ЗША вызваліў 52 палітвязняў і дэпартаваў іх у Літву. Адзін з вызваленых, лідар партыі "Народная Грамада" Мікалай Статкевіч, адмовіўся эміграваць і вярнуўся ў Беларусь.