Стала вядома, на якіх паслугах найбольш зарабляе мінская міліцыя — BELPOL

Найбольшыя прыбыткі мінская міліцыя мае з падбору "прыгожых" аўтамабільных нумароў і прадастаўлення навучальнага аўтамабіля для здачы іспытаў у ДАІ. Гэта вынікае з фінансавай справаздачы ўпраўлення фінансаў і тылу (УФіТ) ГУУС Мінгарвыканкама за першае паўгоддзе 2024 года. Дакумент трапіў у распараджэнне арганізацыі BELPOL.

У даведцы паведамляецца, што за першыя шэсць месяцаў 2024 года супрацоўнікам і служачым мінскай міліцыі выплачана 15,51 млн рублёў у выглядзе прэмій і ўзнагарод, а таксама 7,1 млн рублёў у якасці матэрыяльнай дапамогі. Гэта дазволіла павялічыць сярэдні даход мінскіх міліцыянтаў на 11%.

Даходы сталічнай міліцыі за першае паўгоддзе 2024-га склалі 7,89 млн рублёў, а чысты прыбытак — 4,96 млн рублёў. Прычым паступленні ад пазабюджэтнай дзейнасці ў параўнанні з аналагічным перыядам 2023 года выраслі на 30%, а па адміністрацыйных працэдурах — на 31%. А быў запланаваны рост толькі на 10%.

Найбольшыя прыбыткі сталічная міліцыя атрымала ад наступных паслуг:

прадастаўленне навучальнага аўтамабіля пры здачы экзамену ў ДАІ — 812,8 тысячы рублёў;
падбор рэгістрацыйных знакаў для юрыдычных асоб (116,3 тысячы рублёў) і фізічных асоб (448 тысячы рублёў);
індывідуальны выраб нумарных знакаў — 162,8 тысячы рублёў для юрыдычных асоб і 328,7 тысячы рублёў для фізічных асоб;
захоўванне рэгістрацыйных знакаў — 257 тысячы рублёў;
афармленне заяў і анкет ва ўпраўленні па грамадзянстве і міграцыі — 175,9 тысячы рублёў;
СМС-паведамленні — 41,6 тысячы рублёў;
выезд супрацоўнікаў для збору біяметрыі — 9 тысяч рублёў;
ахова грамадскага парадку — 151,3 тысячы рублёў (у чатыры разы больш, чым за аналагічны перыяд мінулага года).