Стала вядома, колькі маці Колі Лукашэнкі зарабляе як кіраўніца "лечкамісіі"

Стала вядома, які заробак атрымлівае Ірына Абельская — маці Мікалая Лукашэнкі. Вось ужо 16 гадоў яна кіруе Рэспубліканскім клінічным медычным цэнтрам, які знаходзіцца ў структуркі Упраўлення спраў Лукашэнкі. У народзе клініка вядомая з савецкіх часоў пад назвай "лечкамісія".

У 2022 годзе Абельскай налічылі заробак, з якога выплачваліся падаткі і ўзносы, амаль 81,6 тысячы рублёў, піша "Бюро". За 2023 год яе заробак да вылічэння падаткаў склаў 94,7 тысячы рублёў. Тэндэнцыя да росту заробку ў кіраўніцы "лечкамісіі" захавалася і ў 2024 годзе: за 9 месяцаў маці Мікалая Лукашэнкі налічылі больш як 82 тысячы рублёў.

У гутарцы з прадстаўнікамі тг-канала "Белыя халаты" галоўны лекар аднаго з прыватных беларускіх медцэнтраў адзначыў, што такія заробкі — норма для кіраўніка рэспубліканскага медцэнтра. Ён нагадаў, што РНПЦ у беларусі толькі 17 штук і кіруюць імі спецыялісты высокага класа.

"Таму для іх такая зарплата гучыць цалкам адэкватна. Больш за тое, такую зарплату могуць атрымліваць (маглі, прынамсі, раней) дырэктары прыватных медцэнтраў. Праблема толькі ў тым, што Абельская не адпавядае па ўзроўні сваіх кампетэнцый займанай пасадзе", — дадаў медык.