Следчы камітэт атрымае "безлімітны" доступ да персанальных звестак беларусаў

Следчы камітэт зможа атрымліваць персанальныя звесткі беларусаў без іх згоды. Гэта вынікае з закона, прынятага 17 красавіка ў Палаце прадстаўнікоў у другім чытанні.

Супрацоўнікам СК дазволяць атрымліваць інфармацыю пра фізічных асоб з розных інфармацыйных сістэм. Таксама яны змогуць мець аддалены доступ да падобных рэсурсаў.

Дарэчы, і да ўвядзення новага закона супрацоўнікі СК маглі запытваць і бясплатна атрымліваць ад дзяржорганаў ды іншых арганізацый інфармацыю, патрэбную для выканання сваіх задач. Але цяпер працэдура будзе значна спрошчаная.

Дарэчы, СК атрымаў і іншыя плюсы ад новага закона. Будучыя следчыя ад моманту залічэння ў Акадэмію МУС будуць мець статус супрацоўнікаў ведамства, а шарагоўцы і малодшы састаў цяпер не павінныя даваць справаздачы падаткавай.

З 1 сакавіка сілавікі ўжо могуць у рэжыме рэальнага часу адсочваць плацяжы беларусаў.