Школьнік не мог сказаць маці пра пераломы рукі, бо яму не аддавалі тэлефон

Віцебскі школьнік атрымаў пераломы рукі, але не мог паведаміць пра іх маці, бо яму не аддавалі мабільнік. Пра гэты выпадак сама маці школьніка расказала ў сацсетцы TikTok.

Інцыдэнт адбыўся 22 кастрычніка ў школе №29. Жанчына кажа, што сын атрымаў пералом дзвюх костак рукі падчас урокаў. У медпункце хлопчык не атрымаў дапамогі, бо там няма пастаяннага супрацоўніка. Таксама вучань не мог затэлефанаваць маці: тэлефон яму не аддавалі без класнай кіраўніцы, а яна таксама адсутнічала. У выніку затэлефанаваць дапамагла адна з настаўніц.

Маці прыехала па сына і сама адвезла яго ў шпіталь, дзе хлопчыку зрабілі аперацыю. Яму паставілі спіцы, і невядома, колькі зойме рэабілітацыя.

Жанчына кажа, што траўма была атрыманая не падчас гульні, а ў выніку "гвалту". Яна заклікала Міністэрства адукацыі звярнуць увагу на праблему булінгу ў школах.

Па словах жанчыны, у школе за некалькі дзён не пацікавіліся станам дзіцяці.