"Шкарпэткі Алаха", Кейт Мідлтан шантажуюць, нашэсце цыкад у ЗША — #ІхНоравы

02/04/2024 - 18:32

Агляд міжнародных навін / @rubanau_collage

У Малайзіі тры крамы пацярпелі ад нападу праз "шкарпэткі Алаха", а ў Вялікабрытаніі злавілі злачынцу, які хаваўся 27 гадоў. Пра гэта і не толькі чытайце ў нашай штодзённай падборцы замежных навін.

Аднаго з самых даўно шуканых злачынцаў у Вялікабрытаніі арыштавалі праз 27 гадоў

80-гадовага Рычарда Бероўза затрымалі па вяртанні ў Вялікабрытанію з Тайланду амаль праз тры дзесяцігодзьдзі пасля таго, як выдалі ордар на яго арышт. Паліцыя высочвала яго са снежня 1997 года — тады ён не з'явіўся ў Каралеўскі суд Чэстэра, дзе мусіў адказаць па двух пунктах абвінавачання ў махлярстве і 11 пунктах абвінавачання ў сексуальным гвалце над дзецьмі.

Свае злачынствы Бероўз, як мяркуецца, здзяйсняў у дзіцячым доме горада Конглтан у перыяд з 1969 па 1971 год, паведамляе The Guardian.

"Я спадзяюся, што яго арышт паслужыць папярэджаннем для ўсіх іншых падазраваных у вышуку", — сказала інспектар Элеанора Аткінсан з паліцыі Чэшыра.

Зараз Бероўз знаходзіцца пад вартай, а ўжо ў аўторак паўстане перад... тым самым Каралеўскім судом Чэстэра, ад якога ўцёк шмат гадоў таму.

Кейт Мідлтан не расказала б пра хваробу, калі б не шантаж

Відэазаяву прынцэсы Уэльскай, у якой яна падрабязна расказала пра сваё змаганне з ракам, было апублікаванае пад прымусам — пасля званка невядомых. Махляры пагражалі Кейт Мідлтан, што самі раскажуць грамадскасці пра яе дыягназ. Пра гэта піша Daily Mail са спасылкай на свае крыніцы.

Пакуль незразумела, адкуль адбылася ўцечка. Вядома толькі, што трое супрацоўнікаў лонданскай клінікі, у якой лячылася прынцэса, зараз знаходзяцца пад следствам.

Сетка крам, якая прадавала "шкарпэткі Алаха", пацярпела ад нападу

Тры крамы ў Малайзіі закідалі кактэйлямі Молатава пасля таго, як у сеціве з'явіліся фатаграфіі шкарпэтак з надпісам "Алах". Мусульмане палічылі іх за абразлівыя.

У выніку інцыдэнтаў ніхто не пацярпеў. Расследаваннем займаецца паліцыя.

За некалькі дзён да нападу, генеральнаму дырэктару сеткі крам і яго жонцы былі прад'яўленыя абвінавачанні ў абразе пачуццяў вернікаў. Трох прадстаўнікоў кампаніі-пастаўшчыка шкарпэтак абвінавацілі ў саўдзеле. Усе пяцёра сваю віну адмаўляюць.

Пасля падпалаў султан Ібрагім, кароль Малайзіі, заклікаў да адзінства народаў, якія жывуць у Малайзіі, і недапушчэння расавых спрэчак.

ЗША чакае "цыкадагедон"

Сёлета на паверхню зямлі выйдуць адразу два пакаленні перыядычных цыкад. Гаворка ідзе пра надзвычайнае нашэсце. Чакаюць з'яўлення сотняў трыльёнаў ці нават квадрыльёнаў асобін.

Перыядычныя цыкады — род цыкад з 13-гадовым і 17-гадовым жыццёвымі цыкламі. Яны насяляюць ўсходнюю частку Паўночнай Амерыкі. Цыкады жывуць пад зямлёй і выпаўзаюць на паверхню раз на 13 або 17 гадоў, пакрываючы сабой усё навокал.

Апошнім разам падобнае нашэсце адбылося ў 1803 годзе.

Цыкады не наносяць такой шкоды сельскай гаспадарцы, як саранча, хоць і здольныя нашкодзіць маладым дрэвам і фруктовым культурам. Таксама вядома, што цыкады — вельмі гучныя істоты. Узровень шуму гэтых насякомых дасягае 110 дэцыбел.

Яшчэ больш маштабны "цыкадагедон" павінен, на думку экспертаў, адбыцца ў 2076 годзе, калі на паверхню выйдуць два яшчэ больш буйных вывадка цыкад. Але калі той 2076 год.