Прэзідэнт Польшчы правёў калядны прыём для беларускай дыяспары

13 студзеня ў варшаўскім палацы Бельведэр прэзідэнт Польшчы Караль Наўроцкі правёў калядны прыём для прадстаўнікоў беларускай дыяспары.

Сярод гасцей былі беларускія палітыкі, былыя палітвязні, дзеячы культуры, журналісты ды іншыя прадстаўнікі беларускай супольнасці. Сярод іх былі Святлана Ціханоўская і яе дарадцы Франак Вячорка і Дзяніс Кучынскі, кіраўнік Народнага антыкрызіснага ўпраўлення Павел Латушка, "міністарка эканомікі" ў Аб'яднаным пераходным кабінеце Аліса Рыжычэнка, віцэ-спікерка Каардынацыйнай рады Ліза Пракопчык. З ліку нядаўна вызваленых палітвязняў прысутнічалі рэдактарка Марына Золатава, адвакат Максім Знак (які прыйшоў у вышыванцы), журналістка Ксенія Луцкіна. Таксама ў лік запрошаных гасцей трапіў лідар "Еўрапейскай Беларусі", кандыдат у прэзідэнты—2010 Андрэй Саннікаў і яго паплечніца — галоўная рэдактарка "Хартыі-97" Наталля Радзіна.

Рэдактар Еўрарадыё Зміцер Лукашук падарыў Каралю Наўроцкаму сваю кнігу пра беларускую нацыянальную ідэю. Таксама на прыёме былі вядоўцы падкаста "Зроблена ў Польшчы" Максім Паршута і Кірыл Жаўток, аналітык Арцём Шрайбман, сацыёлаг Рыгор Астапеня, акторы-купалаўцы Алег Гарбуз і Крысціна Дробыш ды іншыя прадстаўнікі беларускай дыяспары ў Польшчы.