Бацькам палітвязня, вывезенага за мяжу, сказалі, што ён уцёк з калоніі

Спецслужбы Лукашэнкі ціснуць на сваякоў палітвязняў, вызваленых і прымусова вывезеных з Беларусі. Пра гэта на прэс-канферэнцыі 13 студзеня ў Варшаве расказала прадстаўніца Аб’яднанага пераходнага кабінета (АПК) па сацыяльнай палітыцы Вольга Зазулінская.

Паводле яе, сілавікі нядаўна прыходзілі да бацькоў аднаго з экс-палітвязняў. Яны прапанавалі яму вярнуцца ў Беларусь і адседзець 15 гадоў.

"Яго спачатку выкідаюць за межы краіны, не пытаючыся, ці хацеў ён з’язджаць, а потым прапануюць [гэта]. <…> Калі маці сказала пра тое, што "вы ж яго самі вывезлі", то ёй адказалі, што ён уцёк з калоніі", — цытуе выданне "Позірк" прадстаўніцу АПК.

Таксама Зазулінская паведаміла, што ціск на сваякоў палітвязняў адбываецца і праз іншыя дзяржаўныя службы. Да іх прыходзяць супрацоўнікі розных інстанцый, каб выявіць месца знаходжання экс-палітвязня. "І выкарыстоўваюць розныя формы ціску <…>. Гэта можа быць не толькі жонка і дзіця, гэта могуць быць і сталыя бацькі",  — дадала яна.

Прадстаўніца АПК звярнула ўвагу, што палітвязні, высланыя за мяжу, маюць невыразны прававы статус. Вельмі часта іх высылаюць без пашпартоў. А ў даведках аб вызваленні з месцаў пазбаўлення волі не ўказваецца падстава выхаду.

Працяг прымусовага вывазу за мяжу яна ахарактарызавала як магчымую “"гуманітарную катастрофу”. Зазулінская выказала сумнеў, што беларусы замежжа здолеюць забяспечыць усіх сацыяльнай падтрымкай.