Сенат Польшчы прыняў рэзалюцыю па пытанні сфальсіфікаваных выбараў у Беларусі

22 студзеня Сенат Польшчы аднагалосна прыняў рэзалюцыю "па пытанні несумленных выбараў у Беларусі". У ёй змяшчаецца дэкларацыя з заклікам арганізаваць супрацоўніцтва з беларускай Каардынацыйнай Радай (як прадстаўнічым органам у эміграцыі), а таксама заклік да вызвалення палітзняволеных у РБ (на сённяшні дзень іх больш за 1200).

У якасці спецыяльных гасцей на пасяджэнне Сената былі запрошаныя спікерка Каардынацыйнай Рады Анжаліка Мельнікава і намеснік кіраўніцы Аб’яднанага пераходнага кабінета Беларусі Павел Латушка.

Падчас прэс-канферэнцыі маршалак Сената Польшчы Малгажата Кідава-Блоньска заявіла аб планах падпісаць пагадненне аб супрацоўніцтве паміж Сенатам і Каардынацыйнай Радай Беларусі. Падкрэсліваецца, што Сенат прызнае Каардынацыйную Раду фактычна як парламент у выгнанні, які прадстаўляе грамадзянскую супольнасць нашай краіны.

"Нельга дапусціць аднаўлення суб’ектнасці Лукашэнкі, — гаварыў Латушка. — Мы разлічваем, што пасля рашэння Сената Польшчы аналагічныя рашэнні прымуць іншыя нацыянальныя парламенты, а таксама Еўрапарламент... Лукашэнка з'яўляецца злачынцам, і гэта павінна атрымаць прававую ацэнку. Ён здзейсніў і працягвае здзяйсняць масавыя злачынствы супраць чалавечнасці супраць беларускага народа".

"Каардынацыйная Рада як прадстаўнічы орган прызнаецца ў якасці партнёра для супрацоўніцтва не толькі нацыянальнымі парламентамі, але і міжнароднымі арганізацыямі, такімі як Парламенцкая асамблея Рады Еўропы, — кажа Мельнікава. — Ужо ў бліжэйшую нядзелю дэлегацыя Каардынацыйнай Рады адправіцца ў Страсбург, каб упершыню ў гісторыі Беларусь была прадстаўленая на такім высокім узроўні".