Расія рыхтуе правакацыі з украінскімі палоннымі ў Беларусі — Зяленскі
Палонныя ўкраінцы пасля вяртання на радзіму / РБК-Украіна
Расія рыхтуе ў Беларусі серыю правакацый з украінскімі палоннымі. Іх прымусяць запісваць відэазвароты да бацькоў са скаргамі на нібыта "бяздзейнасць" украінскага боку. Пра гэта на сустрэчы з журналістамі паведаміў прэзідэнт Украіны Уладзімір Зяленскі, перадае РБК-Украіна.
"Складаныя перамовы па спісах праводзіць Рустэм Умераў з Уладзімірам Мядзінскім. Нам зразумела са звестак Службы замежнай разведкі Украіны, што хочуць рабіць расіяне. Яны хочуць напаўняць спісы ўкраінцаў толькі са свайго боку, нягледзячы на наш запыт", — сказаў Зяленскі.
Гаворачы аб правакацыйных відэазваротах, ён назваў гэта спробай ціску на ўкраінскія ўлады. "Але мы робім усё, каб былі рэалізаваныя ўсе папярэднія дамоўленасці аб абменах, а гаворка ішла аб розных этапах абменаў. Працуем, каб вярнуць усіх нашых людзей дадому", — дадаў украінскі прэзідэнт.
Украіна і Расія праводзяць абмены палоннымі на тэрыторыі Беларусі. Апошні такі абмен адбыўся 2 кастрычніка. Ва Украіну вярнуліся 185 абаронцаў — воінаў Узброеных Сіл, Нацгвардыі, Дзяржаўнай памежнай службы. Большасць з іх былі ў палоне з 2022 года. Разам з вайскоўцамі на радзіму вярнулі і 20 грамадзянскіх асобаў.
