Пуцін "разбурае Расію", заявіў Трамп
Дональд Трамп у Белым доме падпісвае дакументы, 20 студзеня 2025 года / АР
Прэзідэнт ЗША Дональд Трамп, інаўгурацыя якога прайшла напярэдадні, зрабіў першыя заявы і падпісаў першыя ўказы. Ён памілаваў амаль 1500 чалавек, абвінавачаных ва ўдзеле ў беспарадках 6 студзеня 2021-га ў Капітоліі. "Гэтыя людзі — закладнікі", — цытуе словы Трампа "Голас Амерыкі".
Дональд Трамп адмяніў шэраг іміграцыйных указаў Джо Байдэна. "Папярэдняя адміністрацыя ўкараніла глыбока непапулярныя, інфляцыйныя, незаконныя і радыкальныя практыкі ў кожнае агенцтва і офіс федэральнага ўрада", — сказаў Трамп, падпісваючы ўказ, які адмяняе дзясяткі папярэдніх указаў Байдэна, уключаючы абарону трансгендэраў.
Уладзімір Пуцін "не вельмі добра сябе адчувае", а Расія страціла ўжо мільён салдат, заявіў прэзідэнт ЗША. Дональд Трамп сказаў, што прэзідэнт Украіны Уладзімір Зяленскі хоча заключыць здзелку для заканчэння вайны, а Пуцін "разбурае Расію", не заключаючы такога пагаднення. Па словах Трампа, ён хоча паразмаўляць пра гэта з расійскім кіраўніком.
