Ці ўзмацніліся праверкі на мяжы Беларусі і Еўрасаюза

Кіраўнік фонду BySol Андрэй Стрыжак папярэдзіў пра паглыбленыя праверкі на мяжы — менавіта на выездзе з Беларусі. Паводле грамадскага дзеяча, сілавікі пільна правяраюць гаджэты і рэчы людзей, якія едуць у Еўрасаюз.

Журналіст Еўрарадыё Тарас Тарналіцкі праверыў, ці можна лічыць такія праверкі масавымі.

У чатах і тэлеграм-каналах, дзе абмяркоўваюць пераход мяжы з ЕС (Літва, Польшча, Латвія), няма інфармацыі пра ўзмацненне праверак. Карыстальнікі пішуць, што дагляд пасажыраў адбываецца гэтак жа, як і раней, і нейкай дадатковай актыўнасці за апошнія паўтара тыдня з боку сілавікоў не назіраецца.

Пры гэтым людзі пацвярджаюць, што пры выездзе з Беларусі могуць адбыцца непрыемныя сюрпрызы.

“У Польшчу будзеце ехаць, правераць пашпарт, паглядзяць вачыма аўто — і едзь куды хочаш. А вось назад ужо могуць што хочаш [зрабіць] — нашы [сілавікі] непрадказальныя. <...> На ўезд дадому могуць [праверыць, тут] як пашанцуе. Да [прэзідэнцкіх] выбараў яны працавалі вельмі моцна. Цяпер латарэя. Туды [у Беларусь] ім похер: пашпарт у парадку — і едзь”, — расказаў адзін суразмоўца адносна сітуацыі на мяжы.

Пра ўзмацненне праверак падчас выбараў паведаміла і іншая суразмоўніца — жанчына, якая кансультуе па пытаннях перасячэння мяжы.

“[Праверкі былі, таму што] выбары і ўсе службы працавалі на баявым дзяжурстве. Ну, на гутаркі вадзілі і будуць вадзіць у асноўным замежнікаў — грамадзян Украіны, а таксама грамадзян Беларусі, якія даўно не былі ў краіне. Стандартныя пытанні: мэта ўезду ў Беларусь, да каго, наколькі, чаму цяпер, дзе працуеце, кім, дзе плануеце спыніцца, калі на дзень, то чаму на дзень. Могуць узяць тэлефон, цалкам праверыць падпіскі, сацсеткі, каментары, публікацыі, галерэя [фотаздымкаў], кантакты”, — адзначае жанчына.

У сваю чаргу Андрэй Стрыжак паведаміў, што ў іх арганізацыі ёсць звесткі пра кантроль і затрыманні на Варшаўскім мосце пару тыдняў таму, у напрамку Польшча — Беларусь. 

“[Затрымалі] да пяці чалавек. <...> Але ж у нас няма магчымасці пастаяннага маніторынгу. Працуем з той інфармацыяй, што паступае”, — падкрэсліў суразмоўца.

Апошнія вялікія затрыманні людзей на мяжы фіксаваліся ў студзені, калі людзі вярталіся з Беларусі пасля сканчэння навагодніх святаў. Тады было затрымана не меней за 8 чалавек.