Прапагандысты паказалі палітвязня Юрыя Зянковіча

Прапагандысты паказалі беларускага палітвязня Юрыя Зянковіча. Падчас запісу інтэрв'ю ён быў у касцюме. Палітзняволеных журналістаў, з якімі прапагандысты таксама гутарылі, паказвалі ў турэмных робах. Гутарку з Зянковічам АНТ пакажа ў пятніцу.

Юрый Зянковіч — юрыст, мае грамадзянства Беларусі і ЗША. Яго затрымалі ў красавіку 2021-га ў Маскве па справе аб "змове з мэтай захопу дзяржаўнай улады неканстытуцыйным шляхам" у Беларусі і вывезены на радзіму. У верасні 2022-га асуджаны на 11 гадоў калоніі ўзмоцненага рэжыму. Зянковіч быў прызнаны вінаватым не толькі ў "змове", але і ў "стварэнні экстрэмісцкага фармавання і кіраўніцтва ім", "публічных закліках да захопу дзяржаўнай улады", "распальванні сацыяльнай варожасці". У канцы 2022 года палітвязня судзілі па справе аб "абразе прадстаўніка ўлады". Спачатку ён адбываў тэрмін у бабруйскай калоніі № 2, пазней яго перавялі на турэмны рэжым у Магілёў.

Восенню 2024-га Юрыю Зянковічу дадалі яшчэ 2 гады зняволення, ён знаходзіўся у СІЗА КДБ.