Поспехі УСУ пад Херсонам і атакі расіян на Данбасе — 188-я раніца вайны

Расіяне працягваюць спрабаваць усталяваць поўны кантроль над тэрыторыяй Данбаса, а таксама ўтрымаць захопленыя раёны Херсонскай, часткі Харкаўскай абласцей, Запарожжа і Мікалаева, гаворыцца ў ранішняй зводцы Генштаба УСУ. Паводле звестак амерыканскага Інстытута вывучэння вайны, расіяне ўчора зноў правялі абмежаваныя наземныя атакі ля Славянска, Северска, і Бахмута, спрабавалі прасунуцца вакол Данецка.

Напярэдадні актывізаваліся баявыя дзеянні ў Херсонскай вобласці. Украінскія вайскоўцы прарвалі тут першую лінію абароны расійскіх войскаў. Адзін з расійскіх палкоў адышоў са сваіх пазіцый, паведамлялі ва ўкраінскім аператыўным камандаванні "Поўдзень". Там адзначылі, што ва Украіны ёсць шанец вярнуць свае тэрыторыі, "таму што HIMARS ўжо знішчылі амаль усе буйныя масты". А значыць расійская армія апынулася адрэзаная ад паставак зброі і асабістага складу з Крыма.

Украінскія войскі вызвалілі пяць населеных пунктаў у першы дзень контрнаступлення, піша амерыканскі Інстытут вывучэння вайны са спасылкай на расійскія і заходнія крыніцы. Але адзначае, што ўкраінскія крыніцы аб вызваленні якіх-небудзь населеных пунктаў пакуль маўчаць. Раней CNN сцвярджала са спасылкай на вайсковага чыноўніка неўсталяванай краіны, што ўкраінскія войскі вызвалілі Праўдзіна (прыкладна за 34 км на паўночны захад ад Херсона), Навадзмітроўку і Томіну Балку (абодва прыкладна за 23 км на захад ад Херсона), а таксама пасёлак Архангельскае на ўсходнім беразе ракі Інгулец і на поўдзень ад мяжы Херсонска-Днепрапятроўскай вобласці.

Прэзідэнт Украіны Уладзімір Зяленскі заклікаў расійскіх вайскоўцаў бегчы або здавацца ў палон, калі яны хочуць выжыць. Пра гэта ён казаў учора ўвечары ў традыцыйным відэазвароце. Зяленскі падкрэсліў, што Украіна вяртае сваё — свае тэрыторыі ў Харкаўскай, Луганскай, Данецкай абласцях, Запарожжы, а таксама Херсон, Крым і ўкраінскую акваторыю Чорнага і Азоўскага мораў.

"Акупанты павінны ведаць, мы будзем гнаць іх да нашай мяжы, лінія якой не мяняецца, рускія яе добра ведаюць. Калі яны хочуць выжыць, то настаў час бегчы. Едзьце дадому", — сказаў украінскі прэзідэнт.

Шэраг украінскіх гарадоў гэтай ноччу і раніцай зноў былі пад абстрэламі. Напружаная ноч —  з трывогамі і абстрэламі — была, у прыватнасці, у Днепрапятроўскай вобласці, піша кіраўнік абласной ваеннай адміністрацыі Валянцін Разнічэнка. Па Нікапальскім раёне білі з" Градаў " і цяжкай артылерыі.

"У Нікапале пашкоджаныя аўтавакзал, крамы і дзіцячая бібліятэка. Выведзеныя са строю дзве лініі электраперадач. Адну электрыку ўжо ўключылі. Іншую чыняць. На дадзены момант без святла да 500 сем'яў", — піша Разнічэнка.

Раніцай расіяне выпусцілі ракеты па горадзе Запарожжа, паведаміў старшыня Запарожскай абласной ваеннай адміністрацыі Аляксандр Старух. Напярэдадні расіяне абстрэльвалі Сумскую вобласць — тут за суткі было зафіксавана 43 прылёты. Ахвяр і разбурэнняў, на шчасце, няма.

Расія павінна пагадзіцца на стварэнне дэмілітарызаванай зоны вакол захопленай Запарожскай АЭС. Так лічаць у Белым доме. Аб гэтым піша Reuters са спасылкай на каардынатара па камунікацыях Савета нацыянальнай бяспекі ЗША Джона Кірбі. Па словах Кірбі, адміністрацыя Байдэна падтрымлівае візіт на станцыю місіі (МАГАТЭ). Ён таксама адзначыў, што "самым бяспечным варыянтам была б кантралюемы прыпынак рэактараў на АЭС".

Тым часам у ЗША ўважліва сочаць за радыяцыйнай сытуацыяй на ЗАЭС, піша CNN са спасылкай на высокапастаўленага амерыканскага чыноўніка па пытаннях абароны. Прыкмет павышанага або анамальнага ўзроўню радыяцыі амерыканскія спецыялісты пакуль не заўважылі. Пры гэтым чыноўнік-суразмоўца CNN адзначыў, што ЗША "з вялікай упэўненасцю ведаюць", што расіяне вядуць агонь з раёна вакол АЭС. У той жа час гэты чыноўнік сказаў, што "магчыма, ёсць верагоднасць", што ўкраінцы таксама стралялі паблізу ЗАЭС у адказ на атакі расіян. Нагадаем, Масква і Кіеў абвінавачваюць адзін аднаго ў абстрэлах станцыі.

Лідар "Еўрапейскай салідарнасці" і пяты прэзідэнт Украіны Пётр Парашэнка перадаў украінскім парамедыкам робата, які можа вывозіць параненых байцоў з-пад абстрэлаў. Па яго словах, гэты баявы робат ўжо стаіць на ўзбраенні краін NATO. Пра гэта Парашэнка распавёў у Facebook. Гэтага робата можна будзе таксама выкарыстоўваць "для транспартавання боекамплектаў і выканання іншых вайсковых задач", адзначыў Парашэнка. Яго можна таксама ўзброіць аўтаматычнай 30-мм гарматай, супрацьтанкавай сістэмай або абсталяваць разведвальнай сістэмай з радарам.