Польская пракуратура атрымала заяву Карпушонак на Латушку

Нацыянальная пракуратура Польшчы атрымала заяву дэлегаткі Каардынацыйнай Рады Вольгі Карпушонак на кіраўніка Нацыянальнага антыкрызіснага ўпраўлення Паўла Латушку. Пра гэта піша "Зеркало" са спасылкай на афіцыйны адказ.

"Пацвярджаем, што заява [ад Вольгі Карпушонак] атрыманая, але яшчэ не зарэгістраваная", — прыводзіць выданне словы прэс-службы Нацыянальнай пракуратуры Польшчы.

У ведамстве не сказалі, калі менавіта атрымалі заяву. Таксама ў пракуратуры не паведамілі пра пачатак расследавання або адмову ад яго (паводле пар. 1 арт. 305 Крымінальна-працэсуальнага кодэкса Польшчы, зрабіць гэта трэба неадкладна пасля атрымання паведамлення аб злачынстве).

Пракуратура не можа ігнараваць заяву. Аднак яна можа адмовіцца расследаваць, калі ў заяве няма дастатковых падставаў для пачатку следства. Пры неабходнасці дадатковай праверкі фактаў пракуратура мае 30 дзён з моманту атрымання заявы для прыняцця рашэння.

Аналагічны запыт "Зеркало" накіравала ў пракуратуру Іспаніі, куды карпушонак, паводле яе словаў, таксама падала заяву. Афіцыйнага адказу выданне пакуль не атрымала.

30 жніўня Карпушонак апублікавала ў сацсетках заяву, у якой вінаваціла Латушку ў харасменце і сексуальных дамаганнях. Кіраўнік НАУ адпрэчыў абвінавачанні. 2 верасня дэлегатка КР паведаміла, што падала заявы супраць Латушкі ў пракуратуры Іспаніі ды Польшчы. Таксама яна заявіла, што пакінула тэрыторыю ЕС, асцерагаючыся за сваю бяспеку.

5 верасня Латушка паведаміў, што падаў у варшаўскі суд пазоў супраць Карпушонак аб абароне гонару і годнасці.

Месцазнаходжанне Вольгі Карпушонак на цяперашні момант невядомае. Выказваюцца меркаванні, што яе заявы могуць быць інспіраваныя беларускімі спецслужбамі.