Польшча хоча падоўжыць спрошчаную выдачу беларусам праязнога дакумента замежніка

Польшча мае намер да 31 снежня 2025 года падоўжыць для беларусаў спрошчаны парадак выдачы праязнога дакумента замежніка. Падрыхтаваны праект адпаведнага распараджэння міністра ўнутраных спраў і адміністрацыі, піша MOST.

Праязны дакумент замежніка — гэта часовая замена пасведчання асобы. Дакумент выдаюць тым замежнікам, у якіх пашпарт згублены ці не сапраўдны, а атрымаць новы няма магчымасці. Беларусам сталі выдаваць такія дакументы пасля таго, як Лукашэнка забараніў консульствам за мяжой мяняць дакументы грамадзянам РБ.

Спрошчаны парадак выдачы характарызуецца тым, што:
— атрымаць праязны дакумент могуць нават тыя беларусы, якія ніколі раней не мелі праязнога дакумента (у тым ліку пашпарта), у тым ліку дзеці;
— беларусам не трэба даказваць, што яны не могуць атрымаць пашпарт ад уладаў сваёй дзяржавы;
— для падачы заявы падыходзяць не толькі пастаянны ВНЖ, карта доўгатэрміновага рэзідэнта ЕС, гуманітарны ВНЖ або статус дадатковай абароны, але і часовы ВНЖ (незалежна ад мэты выдачы).

Акрамя таго, грамадзянаў Беларусі бестэрмінова вызвалілі ад выплаты збору за выдачу дакумента.

Аўтары праекта ў абгрунтаванні канстатуюць, што гэтае рашэнне апраўданае і гэта пацвярджаецца тым, што пастаянна павялічваецца колькасць заяў ад беларусаў на атрыманне польскага праязнога дакумента замежніка. У 2020 годзе такіх заяў было толькі шэсць, у 2021-м — 22, у 2022 годзе — 138.

Значны рост пачаўся з 2023 года, калі стала немагчыма абмяняць беларускія пашпарты ў консульствах. У тым годзе беларусы падалі 1460 заяў на польскі праязны дакумент, у 2024-м — 3893, а ад пачатку 2025 года па 15 красавіка гэтага года — ужо 1494.

Павялічваецца і колькасць выдадзеных беларусам польскіх праязных дакументаў замежніка. У 2023 годзе іх атрымалі 983 беларусы, у 2024-м — 3328, а сёлета да 15 красавіка — 1272.