Польшча адкрые мяжу з Беларуссю ў ноч на 25 верасня
На беларуска-польскай мяжы, ілюстрацыйнае фота / PAP
У ноч на чацвер, 25 верасня, Польшча адкрые мяжу з Беларуссю. Пра гэта заявіў прэм'ер-міністр Дональд Туск.
"Мы прынялі рашэнне сумесна з міністрам унутраных спраў, які сёння выдасць адпаведную пастанову аб адкрыцці чыгуначных і аўтамабільных памежных пераходаў [з Беларуссю], якія былі зачыненыя ў сувязі з манеўрамі "Захад" і ростам пагрозы і палітычнай нестабільнасці каля нашай мяжы", — перадаюць польскія СМІ словы кіраўніка ўрада.
Польшча цалкам закрыла мяжу з Беларуссю 12 верасня. Фармальна гэта было прымеркавана да правядзення беларуска-расійскіх вайсковых вучэнняў "Захад-2025". Пры гэтым афіцыйная Варшава падкрэсліла, што адкрыццё мяжы не адбудзецца аўтаматычна пасля заканчэння вучэнняў, прызначаных на 12-16 верасня.
Паводле Туска, закрыццё мяжы з Беларуссю выканала сваю задачу: "Калі напружанне ўзрасце ці паводзіны нашых суседзяў зменіцца, мы зноў прымем такое рашэнне. Гэтыя прамыя прычыны цяпер скончыліся".
Ён нагадаў, што нядаўна ў Польшчы таксама прайшлі сумесныя вайсковыя вучэнні.
