Памежны камітэт атрымае 300 тысяч долараў ад міжнароднага фонду на ахову мяжы

Беларускія памежнікі атрымаюць грошы ад міжнароднага фонду на ахову мяжы. Пра гэта паведаміў афіцыйны прадстаўнік Дзяржаўнага памежнага камітэта Антон Бычкоўскі.

Паводле яго, фінансаванне адбываецца ў рамках праекта міжнароднай тэхнічнай дапамогі пад назвай "Узмацненне патэнцыялу Дзяржаўнага памежнага камітэту Рэспублікі Беларусь у сувязі з магчымым павелічэннем выпадкаў прыбыцця мігрантаў на мяжу".

"Фінансуецца ён Фондам развіцця Міжнароднай арганізацыі па міграцыі, і бюджэт праекта складае 300 тысяч долараў ЗША", — дадаў Бычкоўскі.

Разам з тым прадстаўнік Памежнага камітэта выказаў прэтэнзію, што суседнія з Беларуссю краіны адмаўляюцца супрацоўнічаць у гэтай сферы і прадастаўляць фінансы.

"Хацелася б, каб падобныя крокі насустрач таксама былі зробленыя іншымі зацікаўленымі міжнароднымі арганізацыямі, а таксама Еўрасаюзам", — заявіў ён.

На межах Беларусі з краінамі Еўрасаюза ад лета 2021 года працягваецца міграцыйны крызіс. Беларускія ўлады не спыняюць мігрантаў, якія спрабуюць нелегальна трапіць у ЕС, а часам прадстаўнікі Беларусі нават дапамагаюць ім перабрацца праз мяжу. Нядаўна Лукашэнка заявіў, што спыніць міграцыйны крызіс толькі пры ўмове зняцця санкцый з яго рэжыму.