Лукашэнка сказаў, пры якіх умовах спыніць міграцыйны крызіс

У пагаршэнні адносін з Еўрасаюзам Аляксандр Лукашэнка сябе вінаватым не лічыць. Пра гэта ён заявіў на канферэнцыі па еўразійскай бяспецы ў Мінску.

Ён заявіў, што афіцыйны Мінск не бачыць падставаў у цяперашняй сітуацыі абараняць межы з Еўрасаюзам ад нелегальнай міграцыі. Але калі санкцыі адменяць, Лукашэнка выказаў гатоўнасць забяспечыць парадак на межах.

"Логіка простая: калі вы разбурылі масты, не патрабуйце ад нас наводзіць пераправы. Мы не будзем вас абараняць з пятлёй на шыі. Санкцыі — гэта пятля на шыі беларускага народа, і вы ад нас патрабуеце вас абараняць. Гэтага не будзе", — заявіў ён.

Таксама ён заявіў, што для развязання міграцыйнага крызісу гатовы на "глабальную здзелку — усё на ўсё". Маўляў, такі падыход Трампа ён гатовы абмяркоўваць і з Еўропай.

Міграцыйны крызіс на межах Беларусі з краінамі Еўрасаюза цягнецца з лета 2021 года. Беларускія памежнікі не толькі не ахоўваюць межы, але нярэдка і дапамагаюць мігрантам незаконна перайсці мяжу ў ЕС. Заходнія палітыкі ахарактарызавалі дзеянні афіцыйнага Мінска як форму гібрыднай агрэсіі.