Паліна Шарэнда-Панасюк рэзка адказала Зянону Пазняку

Экс-палітзняволеная Паліна Шарэнда-Панасюк рэзка адказала лідару руху "Вольная Беларусь" Зянону Пазняку, які крытыкаваў яе.

Адказ Паліны апублікаваў у сацсетках яе муж Андрэй Шарэнда:

"Паважаны сп. Зянон Пазняк! Палітвязні — гэта закладнікі рэжыму Лукашэнкі. Упэўненая, вы не аспрэчваеце тое, што захопленыя акупацыйным рэжымам беларусы менавіта закладнікі перастаюць быць закладнікамі ў наступных выпадках:
Іх выкупляюць;
Іх абменьваюць;
Іх вызваляюць у выніку сілавой аперацыі па вызваленні закладнікаў/ультыматыўнага ціску на захопнікаў;
Іх забіваюць;
Яны забіваюць сабе самыя.
На жаль, нічога новага за тысячы год гісторыі чалавецтва не вынайшла ў падобнай сітуацыі. Зразумела, першыя тры варыянты нам не ўсміхнуліся. Беларускім закладнікам пакінулі толькі два апошнія. Выратаванне тапельцаў — справа рук саміх тапельцаў: перад такім фактам паставілі нас каты — памілоўка + інтэрв'ю + паперка аб супрацоўніцтве. Толькі так, адным пакетам. Ніякіх іншых варыянтаў. Я напісала паперу пад дыктоўку 24 снежня 2024 і 3 лютага 2025, не ў 2010-х, не ў 2021 ці 2023. Прайшоўшы 270 пачварных дзён тэрору ШІЗА, год ПКТ і дзясяткі пякельных этапаў. Ведаючы, што ані секунды не збіраюся быць Эдэльвейсам, што маю імгненні на тое, каб уцячы з канцлагеру пад назвай РБ, рызыкуючы жыццём.
Сп. Зянон! Ёсць усе ж яшчэ адзін метад выратавання закладнікаў — калі хтосьці прапаноўвае сябе на іхнае месца. У лукашысцкіх лагерах смерці засталіся Вікторыя Кульша, Вольга Маёрава, Алена Гнаук. Калі Лукашэнка такі міласэрны, калі прыслухоўваецца да вас — прапануйце сябе на іх месца. Паспытайце таго праз што рэжым прапусціў іх, і тады, калі застанецеся жывыя, здаровыя, пры розуме, не ўзненавідзіце ўвесь свет, мы абмяркуем з вамі маральныя бакі пытання.
З павагай, Паліна Шарэнда-Панасюк".

Як расказвала Еўрарадыё, Пазняк у прыватнасці раскрытыкаваў тое, што палітзняволеная падпісала згоду на супрацу з КДБ, атрымаўшы пазыўны "Эдэльвейс". Пра тое, што яе прымусілі падпісаць гэтую паперу, Паліна Шарэнда-Панасюк паведаміла адразу пасля выезду з Беларусі.