Падчас выступу Макса Каржа ў Варшаве затрымалі больш за 100 чалавек
Паліцыя каля варшаўскага стадыёна, дзе праходзіў канцэрт Макса Каржа / ksp.policja.gov.pl
Варшаўская паліцыя адзначыла канцэрт рэпера Макса Каржа як мерапрыемства з самай вялікай колькасцю інцыдэнтаў за мінулыя выходныя.
Паведамляецца, што з 8 па 10 жніўня паліцыя польскай сталіцы забяспечвала парадак на розных масавых мерапрыемствах, у тым ліку на канцэрце Макса Каржа на стадыёне PGE Narodowy.
Падчас канцэрту за парушэнні былі затрыманыя 109 чалавек — за захоўванне наркотыкаў, выкарыстанне піратэхнікі ды супраціў ахове. Паліцыя выпісала 50 штрафаў на суму больш за 11 тысяч злотых. Акрамя таго, у суд былі накіраваныя 38 спраў, звязаных з гэтым канцэртам.
У прэс-службе паліцыі адзначаюць, што парадак у гэтыя выходныя давялося забяспечваць і на іншых мерапрыемствах, у тым ліку на футбольным матчы. Аднак большасць інцыдэнтаў і затрыманняў прыпала менавіта на канцэрт беларускага спевака.
Агулам за тры дні паліцыянты затрымалі 125 чалавек, выпісалі 99 штрафаў і пачалі 39 судовых спраў.
