Фанаты Каржа ўчынілі вечарыну, загадзіўшы раён Варшавы. Ёсць затрыманыя

8 жніўня, напярэдадні канцэрта беларускага артыста Макса Каржа, ягоныя фанаты ўчынілі несанкцыянаваную начную вечарыну ў Варшаве ў раёне Воля на былых чыгуначных тэрыторыях.

Паводле сведкаў, у мерапрыемстве ўдзельнічалі некалькі тысяч чалавек. Жыхары расказалі пра моцны шум, блакіроўку дарог з-за няправільна прыпаркаваных аўтамабіляў, запуск сігнальных ракет і феерверкаў, недахоп парковачных месцаў, а таксама пакінутыя смецце і спраўленне натуральных патрэбаў у грамадскіх месцах.

Паліцыя Варшавы выпісала 25 штрафаў і затрымала шэсць чалавек у сувязі з захоўваннем наркотыкаў.

Паводле паведамлення прэс-афіцэра паліцыі Варшавы, у пікавы момант у аперацыі па навядзенні парадку было задзейнічана некалькі сотняў паліцэйскіх, арганізатар вечарыны ўстаноўлены, падрыхтаваны запыт у суд наконт яго пакарання.

Нагадаем, што канцэрт Макса Каржа адбыўся на нацыянальным стадыёне ў Варшаве 9 жніўня і сабраў каля 60 000 гледачоў.