Пачынаюць судзіць маці і цётку палітвязня Аляксандра Францкевіча

10 лютага пачынаюць судзіць маці і цётку палітвязня Аляксандра Францкевіча. Таццяну Францкевіч і Наталлю Лабацэвіч затрымалі ў ліпені мінулага года. Іх абвінавачваюць у "садзейнічанні экстрэмісцкай дзейнасці" (арт. 361-4 КК).

Праваабаронцам пакуль дакладна невядома, у чым дакладна абвінавачваюць жанчын. Іх справу разглядае Віцебскі абласны суд (суддзя — Галіна Бондал). Францкевіч і Лабацэвіч прызнаныя палітзняволенымі.

Аляксандр Францкевіч — актывіст анархісцкага руху і фігурант справы "Рэвалюцыйнага дзеяння", за кратамі знаходзіцца са жніўня 2020 года. У верасні 2022-га асуджаны на 16 гадоў і 9 месяцаў калоніі строгага рэжыму (спачатку былі 17 гадоў, пасля Вярхоўны суд у парадку апеляцыі трохі скараціў тэрмін). Яго прызналі вінаватым у "арганізацыі масавых беспарадкаў", "закліках да санкцый", "стварэнні экстрэмісцкага фармавання" і г. д. Францкевіч некалькі месяцаў правёў у ШІЗА.

Наталля Лабацэвіч — маці былога палітвязня Іллі Лабацэвіча, які адбыў паўтара года ў зняволенні і выйшаў на волю тры гады таму.