“Нямая ліхаманка” пройдзе ў Варшаве — кінапаказы пад жывую музыку

У жніўні - пачатку верасня ў Варшаве пройдуць паказы нямога кіно пад жывую музыку. Падчас фестываля “Нямая ліхаманка” пакажуць фільмы з Украіны, Польшчы, Германіі і Беларусі, а менавіта — “Прыгоды паўрубля” Аксэля Лундзіна, “Белы след” Адама Кшэптоўскага, “Фауст” Фрыдрыха Мурнаў і “Прыстытутка” Алега Фрэліха.  

“У еўрапейскіх краінах бачная вялікая павага і інтарэс да нямых стужак — мы паглядзелі на гэта і вырашылі зрабіць яшчэ адно свята кіно ды музычнай інтэрпрэтацыі ў польскай афішы”, — напісала Ірэна Кацяловіч, адна з арганізатарак “Нямой ліхаманкі”.

Беларускія і польскія кампазітары напісалі музыку адмыслова для гэтых фільмаў. Яе заграюць: Вольга Падгайская, Дар’юш Пшыбыльскі, Александра Хмелеўска, Філіп Спорняк і Five-Storey Ensemble.

Усе падзеі пройдуць у Музеі Вольнай Беларусі (Foksal 11). Квіткі ўжо можна набыць тут.