Наступствы аварыі ў Мазыры спадзяюцца ліквідаваць апоўначы

Наступствы аварыі ў Мазыры спадзяюцца ліквідаваць апоўначы (а як у выніку атрымаецца, спрагназаваць немагчыма). Увечары там правялі дэмантаж двух дэфектных участкаў трубаправода цеплавой магістралі, вядуцца зварачныя працы. На месцы працуюць аварыйныя брыгады, у складзе якіх больш за 20 чалавек. Як піша раённая газета, яны "ўкамплектаваны ўсім неабходным абсталяваннем і матэрыяламі для хутчэйшага аднаўлення нармальнай схемы цеплазабеспячэння".

Аварыя на цеплавой сетцы здарылася, верагодна, яшчэ раніцай (магчыма, на тэрыторыі Мазырскай ЦЭЦ). Мясцовым жыхарам абяцалі, што яе наступствы аператыўна ліквідуюць. Аднак аднаўленчыя працы зацягнуліся.

"Гомельэнерга" не паведамляе, што стала прычынай пашкоджання трубаправода. Сцвярджалася, што жыхароў Мазыра пераключылі на рэзервовую цеплавую магістраль. Аднак частка горада застаецца без цяпла ці гарачай вады, пра гэта людзі пішуць у чатах.

Аднаўленне "нармальнай схемы цеплазабеспячэння" абяцаюць толькі пасля заканчэння рамонтных работ.