МУС: пратэстоўцы "цынічна выкарысталі... факт смерці Рамана Бандарэнкі"

16/11/2020 - 15:03

Прэс-служба МУС Беларусі дала справаздачу пра свае дзеянні ў нядзелю, 15 лістапада, калі па краіне прайшлі акцыі памяці загінулага Рамана Бандарэнкі. Па звестках праваабаронцаў, былі затрыманыя больш за 1,2 тысячы чалавек. Міліцыя не дае лічбу ўсіх затрыманых, піша толькі пра "больш за 700", якіх пакінулі за кратамі да суда. "Па фактах актыўнага супраціўлення супрацоўнікам органаў унутарных спраў, блакавання руху праводзяцца праверкі ў рамках крымінальна-працэсуальнага заканадаўства", — пагроза пратэстоўцам крымінальнымі справамі.

МУС паведамляе пра 35 пратэстных акцый у Беларусі і адзначае змяншэнне іх удзельнікаў. Жорсткія затрыманні людзей каля станцыі метро "Пушкінская" і ў дварах дамоў па вуліцы Прытыцкага тлумачацца неабходнасцю "стабілізацыі абстаноўкі". "Сіламі правапарадку групы пратэстоўцаў былі раззасяроджаныя, найбольш актыўныя затрыманыя", — рапартуе прэс-служба.

Далей ідзе каментар пра падзеі на "Плошчы перамен", дзе сілавікі знішчылі народны мемарыял Раману Бандарэнку. "Арганізатары пратэстнай акцыі цынічна выкарысталі ў сваіх мэтах факт смерці Рамана Бандарэнка, — заяўляе МУС. — Арганізатары фарсу дамагліся таго, што людзі, якія сабраліся там, былі настроеныя агрэсіўна, пра што сведчылі скандаванне палітычных лозунгаў і заклікаў, ненарматыўная лексіка і непрыстойныя жэсты, шматлікія хуліганскія выхадкі".

Высвятляецца, што сілавікам давялося выкарыстаць спецсродкі, бо пратэстоўцы "блакавалі выезд грамадзян з дваравых тэрыторый па вуліцы Чарвякова". "Былі затрыманыя найбольш актыўныя ўдзельнікі", — сцвярджае міліцыя.

Далей згадваюцца вулічныя акцыі ў Брэсце (250 удзельнікаў) і Гродне (200), новыя выпадкі сабатажу на чыгунцы ў Мінскай вобласці, падпаленыя шыны ў Пухавіцкім раёне і раскіданыя металічныя шыпы каля двух вёсак. Распачатыя новыя крымінальныя справы.