Мінчука абвінавацілі ў рэабілітацыі нацызму за адмаўленне Халакосту

48-гадовага мінчука абвінавацілі ў рэабілітацыі нацызму і ўзялі пад варту.

Як заяўляе Следчы камітэт, мужчына больш як тры гады публікаваў у сацсетках выявы і відэаматэрыялы, якія праслаўляюць і гераізуюць зверствы нацыстаў і калабарантаў. Следчыя кажуць, што ў пастах мінчука былі забароненая нацыянал-сацыялістычная сімволіка і атрыбутыка, фатаграфіі Гітлера, відэа з шэсцямі салдатаў вермахта і фашысцкім вітаннем, каментары з узваленнем палітыкі Трэцяга Рэйха.

"Акрамя таго, мужчына настойваў на тым, што Халакост — выдумка і правакацыя з боку прадстаўнікоў рэлігійнай канфесіі, і быў перакананы, што колькасць загінулых у канцэнтрацыйным лагеры Асвенцім істотна перабольшаная. Таксама фігурант аспрэчваў наяўнасць велізарных крэматорыяў, створаных спецыяльна для масавага спалення палонных", — гаворыцца ў паведмаленні СК.

Асобна падкрэсліваецца, што мінчук "не саромеўся пакідаць каментары абразлівага характару і ў дачыненні да прадстаўніка дзейнай улады".

Таксама ў СК кажуць, што мужчына вёў замкнёны лад жыцця, вельмі доўга быў на ўтрыманні ў пажылой маці. Сваякі характарызуюць яго як спакойнага і неагрэсіўнага, але таксама інфантыльнага чалавека, які не жадае працаваць.

Крымінальную справу на яго пачалі паводле трох артыкулаў КК — распальванне варожасці, рэабілітацыя нацызму і абраза ў інтэрнэце прадстаўніка ўлады.