Масавы ператрус правялі міліцыянты ў інтэрнаце мінскага каледжа
Міліцыя праводзіць ператрус у інтэрнаце / Фрунзенскае РУУС Мінска
Антынаркатычны рэйд правяла мінская міліцыя ў інтэрнаце Мінскага дзяржаўнага каледжа тэхналогіі і дызайну лёгкай прамысловасці.
У ім удзельнічалі супрацоўнікі інспекцыі па справах непаўналетніх і аддзела па наркакантролі і супрацьдзеянні гандлю людзьмі Фрунзенскага РУУС Мінска разам з кінолагам і службовым сабакам, паведамляе афіцыёзная газета "СБ. Беларусь сегодня".
Паведамляецца, што ва ўчарашніх школьнікаў шукалі наркотыкі. Службовы сабака старанна абследаваў патэнцыйныя схованкі: спальныя месцы, шафы, тумбачкі. На фатаздымках, зробленых міліцыяй, бачна, што наркотыкі ў шуфлядах шукаў не толькі сабака, але і самі міліцыянты. Ці быў атрыманы ордар на масавы ператрус, у выданні не пішуць.
Пры гэтым у міліцыі падкрэсліваюць, што мэтай рэйду было не запалохванне, а прафілактыка — за кошт нечаканасці і нетрадыцыйнага фармату: "Такі візіт надоўга застанецца ў памяці навучэнцаў".
Дарэчы, ніякіх забароненых рэчываў падчас рэйду не знайшлі.
