Малдова абвясціла персонамі нон грата трох супрацоўнікаў пасольства РФ
"Відавочныя доказы дзейнасці, якая супярэчыць дыпламатычнаму статусу" / ipn.md
Малдова абвясціла персонамі нон грата трох супрацоўнікаў пасольства РФ у Кішынёве. Яны павінны пакінуць тэрыторыю краіны. Прычынай стала дапамога расійскага пасольства асуджанаму дэпутату Аляксандру Несцяроўскаму ва ўцёках у Прыднястроўе. Пра гэта ў панядзелак заявілі расійскаму паслу ў Міністэрстве замежных спраў Малдовы, піша newsmaker.md.
Масква паабяцала адказаць на рашэнне Кішынёва. У МЗС Малдовы падкрэсліваюць, што яно "заснавана на відавочных доказах дзейнасці, якая супярэчыць дыпламатычнаму статусу на тэрыторыі Малдовы".
Дэпутат Несцяроўскі ў сакавіку быў асуджаны на 12 гадоў зняволення "за пасіўную карупцыю" і "стварэнне ўмоў для незаконнага фінансавання палітычнай партыі". Сваю віну ён не прызнаў, у суд не прыйшоў, яго аб'явілі ў вышук. Высветлілася, што Аляксандр Несцяроўскі атрымаў расійскае грамадзянства. За дзень да вынясення прысуду ён быў у пасольстве РФ у Кішынёве, а раніцай яго вывезлі на аўтамабілі з дыпламатычнымі нумарамі ў Прыднястроўе.
