Лукашэнка: "Будзем арыентаваць на чалавечыя рэсурсы. Плюс сала"

Лукашэнка: "Будзем арыентаваць на чалавечыя рэсурсы. Плюс сала"

На нарадзе па зімовых відах спорту 13 красавіка Аляксандр Лукашэнка зноў звярнуўся да харчавання спартоўцаў. 

Да тэмы харчавання ён звярнуўся падчас гутаркі пра допінг. Кіраўнік Беларусі згадаў пра гучныя допінг-скандалы ў сусветным спорце. "Санкцыі ўжываюцца не толькі ў дачыненні да асобных спартоўцаў, але і ў дачыненні да цэлых краін", — перадае БЕЛТА яго словы.

"Таму давайце будзем арыентаваць на чалавечыя рэсурсы. Плюс сала. Спорт павінен быць чыстым. Даравання ў гэтым плане не будзе. Гэта ўжо не тыя часы. Вы бачыце, на які ўзровень узнятая гэтая праблема", — дадаў ён.

Лукашэнка даручыў Мінспорту і Мінздароўя заняцца харчаваннем спартоўцаў. "Які вы хочаце ад іх вынік, калі яны не сочаць за сваёй вагой? Чаму гэтае пытанне не кантралююць лекары нацыянальных камандаў?" — задаўся ён пытаннем.

Кіраўнік Беларусі заявіў, што яго лекар быў вымушаны разам з дыетолагамі заняцца харчаваннем асобных спартоўцаў. Некаторыя з іх не датрымоўваліся рэжыму харчавання, а калі было неабходна скінуць вагу, то спрабавалі вырашыць гэтую праблему за некалькі дзён народнымі спосабамі. "Усе ў сацыяльных сетках абмяркоўвалі, калі я жартам сказаў, што лепшы допінг гэта сала. Гэта не я прыдумаў. Гэта лепшы энергетык для любога спартоўца, асабліва для хакеіста, лыжніка", — звярнуў увагу Лукашэнка.

Заява пра сала прагучала падчас сустрэчы кіраўніка дзяржавы з алімпійскімі і паралімпійскімі чэмпіёнамі 29 сакавіка. Тады ён заявіў, што пасля трэніроўкі трэба есці сала з кавалкам чорнага хлеба.