Кіберпартызаны агучылі рэальную статыстыку смяротнасці ад COVID-19 у Беларусі
У РБ заніжалі статыстыку смяротнасці ад COVID-19
Кіберпартызаны агучылі рэальную статыстыку смяротнасці ад COVID-19 у Беларусі. Падчас пандэміі ў 2020-2022 гадах залішняя смяротнасць у нашай краіне склала звыш 90 тысяч чалавек. Такая выснова зроблена пасля вывучэння баз даных па ўсіх памерлых у Беларусі да 2024 года з афіцыйнымі прычынамі смерці.
"Гэта адна з самых жудасных статыстык у гісторыі Рэспублікі Беларусь як дзяржавы, — пішуць кіберпартызаны. — 90000 смерцяў — усё гэта вынік баязлівасці Лукашэнкі, які ва ўгоду сваёй уяўнай "папулярнасці" адмаўляў праблему эпідэміі, пакуль увесь свет змагаўся з COVID. Але гэта таксама віна ўсіх тых работнікаў дзяржаўных ведамстваў, якія патураюць прыхамацям тырана і спрабуюць стварыць ілюзію стабільнасці ў краіне пры "моцным гаспадарніку".
Мінздароўя сцвярджала, што ад сакавіка 2020-га да ліпеня 2022-га памерлі 7118 чалавек з выяўленым COVID-19. Кіберпартызаны высветлілі, што каранавірусная інфекцыя як прычына смерці ў дакументах пазначаная ў 22759 выпадках. Пры гэтым не ўлічаныя смерці ад ускладненяў розных хвароб, выкліканых COVID-19.
