Хойніцкі рыбак лавіў шчупакоў у возеры на тэрыторыі радыяцыйнага запаведніка

41-гадовага хойніцкага рыбака судзілі за незаконную лоўлю рыбы, што пацягнула шкоду ў буйным памеры, паведамляе прэс-служба пракуратуры.

Здарэнне адбылося 29 кастрычніка 2024 года. Мужчына не злавіў ніводнай рыбы з ракі Прыпяць. Тады ён вырашыў паспрабаваць удачу ў возеры Стараселле ў Палескім дзяржаўным радыяцыйна-экалагічным запаведніку, тэрыторыя якога трапіла пад радыеактыўнае забруджванне падчас катастрофы на Чарнобыльскай АЭС. На гэтай тэрыторыі дзейнічае кантрольна-прапускны рэжым.

Тым не менш рыбак без належнага дазволу злавіў 12 шчупакоў з дапамогай спінінга ў забароненым месцы. Шкоду ад яго дзеянняў ацанілі на суму больш за 4,3 тысячы рублёў. Гэтыя грошы мужчына цалкам выплаціў падчас папярэдняга следства.

Суд пастанавіў аштрафаваць яго яшчэ на 100 базавых велічыняў. Спінінг канфіскавалі на карысць дзяржавы як сродак здзяйснення злачынства.

А на патрабаванне пракурора Хойніцкага раёна рыбак яшчэ "ў добраахвотным парадку" кампенсаваў і кошт злоўленай рыбы — заплаціў 240 рублёў.