Каля запраўкі перавярнулася фура з 20 тонамі бітума (фота, відэа)
Здарэнне адбылося 17 кастрычніка на 66-м кіламетры трасы Мінск — Віцебск, насупраць Плешчаніцкай запраўкі.
Як паведамляе сайт pleschenitsy.by, кіроўца грузавіка МАЗ не саўладаў з кіраваннем. Фура праехала дзве паласы сустрэчнага руху, з'ехала з дарогі і перавярнулася. Адбылася разгерметызацыя цыстэрны і пачаў цекчы бітум.
На месца аварыі прыехалі выратавальнікі, якія залілі пенай участак зямлі, на які выліўся бітум — каб не адбылося ўзгарання.
Паведамляецца, што кіроўца фуры, якога выкінула з кабіны, атрымаў траўмы лёгкай ступені, яго шпіталізавалі ў лагойскую лякарню.
Фота, відэа — pleschenitsy.by
