Ілюстрацыя беларускага мастака апублікаваная ў The New York Times
Дзмітрый Кашталян / фота з яго старонкі ў Інстаграме
У выданні The New York Times з'явілася ілюстрацыя мінскага жывапісца і стрыт-арт-мастака Дзмітрыя Кашталяна. Ёй аздоблены артыкул, прысвечаны птушкам дадо (дронтам), заўважыў Chrysalis Mag.
Стыль беларускага мастака ацаніў арт-дырэктар The New York Times і вырашыў, што Кашталян найлепш праілюструе артыкул. У каментары Chrysalis Mag Кашталян расказаў, што стварыў некалькі эскізаў для артыкула.
"Камандзе выдання спадабаўся адзін з іх, і мы разам давялі яго да розуму. Яны прапанавалі вельмі дакладныя і выйгрышныя змены, што палепшыла агульны канцэпт і захавала мне прастору як аўтару", — падзяліўся падрабязнасцямі мастак.
Раней Дзмітрый Кашталян маляваў таксама для іншых заходніх выданняў — Harper's Magazine, Technology Review, AFAR Media, Entertainment Weekly.
Сам ён родам з Мінска. У беларускай сталіцы ёсць некалькі графіці яго аўтарства. Кашталян займаецца творчасцю больш за 20 гадоў. Ён працуе ў тэхніцы "датворк" ці "пуантылізм".
