Група расійскіх дронаў-камікадзэ зноў залятала ў Беларусь
"Шахеды" перыядычна залятаюць у РБ, пачынаючы з ліпеня (ілюстрацыйнае фота) / Reuters
Група расійскіх дронаў-камікадзэ зноў залятала ў Беларусь (некалькі дзён таму іх было як мінімум два). Уначы некалькі дронаў, якія ўляцелі ва Украіну ў раёне Любеча, узялі паўночна-заходні курс і скіраваліся на Хойнікі і Мазыр. З авіябазы ў Баранавічах ім насустрач вылятаў знішчальнік, піша "Беларускі Гаюн".
Пра гэтае здарэнне згадваецца ў зводцы камандавання Паветраных сіл Украіны. Па яго звестках, у бок Беларусі паляцелі тры расійскія беспілотнікі.
Пазней стала вядома, што дронаў было не менш за 10. Тры з іх было згублена. "Шахеды" заляталі ў раёне Лоева, праляталі больш за 120 км па поўдні Беларусі і вярталіся ва Украіну праз Оўруч.
"Шахеды" перыядычна залятаюць у РБ, пачынаючы з ліпеня. 5 верасня ў Мінабароны Беларусі ўпершыню расказалі пра знішчэнне беспілотнікаў на Гомельшчыне. Але не сказалі, што яны былі расійскія. За збітыя расійскія "шахеды" беларусаў пахвалілі ва Украіне.
