Фільм "Эманюэль" палічылі падрывам адзінства ў Беларусі напярэдадні "выбараў"
Фільм "Эманюэль" у Беларусі назвалі прапагандай і падрывам адзінства перад выбарамі / CNC, France Télévisions, Netflix, Pathé, Rectangle Productions, Logical Content Ventures, Goodfellas, Chantelouve
Грамадскі савет па маральнасці, як выявілася, заклікаў забараніць у Беларусі паказ кінастужкі "Эманюэль", бо яна падрывала адзінства перад "выбарамі". Пра гэта стала вядома з заявы Савета, якую 17 студзеня апублікавала газета "Літаратура і мастацтва", заўважыў сайт "Зеркало".
Эратычная драма "Эманюэль" (экранізацыя рамана Эманюэль Арсан) выйшла ў свет увосень 2024 года.
У артыкуле "Каштоўнасці і спакусы" гаворыцца, што Грамадскі савет па маральнасці абурыў не толькі сам фільм, але і тым, што яго дэманстрацыя ў краіне пачалася ў першы дзень Каляднага посту паводле праваслаўнага календара — 28 лістапада.
"Грамадскі савет па маральнасці ацаніў стужку як наўмысны ўкід варожай нам прапаганды. Напярэдадні выбараў прэзідэнта Рэспублікі Беларусь грамадству трэба быць як ніколі з’яднаным, мэтанакіраваным у дасягненні высакародных мэт для дабрабыту нашай краіны", — гаворыцца ў тэксце.
Савет даслаў ліст у Мінкульт з просьбай спыніць дэманстрацыю фільма.
Ці прыслухалася ведамства да гэтай прапановы невядома. Пракат стужкі ў Мінску адбываўся з 28 лістапада да 11 снежня 2024 года. Многія карціны паказваюць у кінатэатрах даўжэй — ад трох тыдняў да паўтара-двух месяцаў. Але і двухтыднёвы пракат не з'яўляецца чымсьці выключным.
Дарэчы, гледачы пакідалі ў інтэрнэце часцей расчараваныя водгукі пра стужку. Яны скардзіліся на недахоп эротыкі, якая так абурыла Грамадскі савет па маральнасці.
