Феерверк над заснежанымі гарамі: вулкан Этна зноў актывізаваўся
Вулкан Этна, Сіцылія / Euronews
Італьянскі вулкан Этна дасягнуў новага піку актыўнасці, паведамляе Sky News. 27 снежня ў паўночна-ўсходнім кратары пачаліся выбухі. Вынікам сталі магутныя выкіды піракластычных матэрыялаў, якія распаўсюдзіліся па ўсім конусе агнядышнай гары і за яе межы. Вулкан пачаў вывяргаць лававыя фантаны вышынёй 300-400 метраў. Яны суправаджаліся слупамі попелу, якія ўзнімаліся на некалькі кіламетраў у вышыню.
У нядзелю вулкан Этна перайшоў у рэжым "перарывістага" вывяржэння. Гэта значыць, вывяржэнне пачынаецца, спыняецца, а затым вулкан вывяргаецца зноў. Па дадзеных Нацыянальнага інстытута геафізікі і вулканалогіі (INGV), актыўнасць рэзка ўзмацнілася падчас гэтых фаз вывяржэння.
Па дадзеных INGV, цяперашняе вывяржэнне Этны больш маштабнае, чым папярэднія. Нягледзячы на чырвонае папярэджанне аб палётах, цяпер актыўнасць вулкана не аказвае істотнага ўплыву на працу аэрапорта Катанні.
