Экс-палітвязень Банцар прайграў суд віцебскай "хіміі"
Былы палітвязень, гродзенскі музыка Ігар Банцар прайграў суд віцебскай "хіміі", паведамляюць праваабаронцы.
Як пастанавіла суддзя Вольга Шумская, ён павінен заплаціць папраўчай установе 81 рубель 66 капеек, а таксама дзяржпошліну — 64 рублі.
Судзілі Банцара за нявыплату камунальных паслуг за пражыванне ў спецінтэрнаце "хіміі" — з 17 чэрвеня па 17 снежня 2021 года. Музыка казаў, што ў названы час 83 дні з 130 ён правёў у ШІЗА (штрафным ізалятары). Менавіта за гэты час ён адмаўляўся плаціць, бо камунальнымі паслугмі не карыстаўся.
Аднак суддзя вырашыла іначай.
Банцар быў асуджаны на паўтара года "хіміі" за перформанс у выглядзе танца без штаноў перад машынай міліцыі. На волю ён выйшаў у снежні 2021 года.
