Дзяржбяспека Літвы не каментуе сітуацыю з "пашпартам прыкрыцця" Фёдара Гарбачова
Фёдар Гарбачоў і Віктар Макавееў — уладальнікі розных пашпартоў / пашпартная база
Працягвае раскручвацца скандал з "пашпартам прыкрыцця" айцішніка Фёдара Гарбачова, мужа журналісткі Вольгі Сямашка.
Першай тэму "падстаўнога пашпарту" ўзняла арганізацыя "Байпол". Еўрарадыё задало Аляксандру Азараву, кіраўніку "Байпола" і ўласніку дэтэктыўнага агенцтва “Рэкс”, шэраг пытанняў на гэтую тэму. Мы пацікавіліся, як "Байпол" выйшаў на факт наяўнасці двух дакументаў у Фёдара Гарбачова. Таксама спыталіся, ці перадаваў "Байпол" гэтыя факты ў Дэпартамент дзяржбяспекі Літвы (там цяпер пражывае сям'я Гарбачова і Сямашка) і чаму не рабіў публічную заяву наконт сітуацыі.
"Добры дзень, мы не каментуем гэту тэму", — адказаў Азараў.
Таксама Еўрарадыё звярнулася па каментар наконт двух пашпартоў у Дэпартамент дзяржбяспекі Літвы. Адказ ад літоўскай спецслужбы быў такі ж самы: "Мы не маем каментароў па гэтай тэме".
Пра "пашпарт прыкрыцця" айцішніка Фёдара Гарбачова, выдадзены ў 2018-м на імя Віктара Макаеева, напісала напярэдадні "Наша Ніва". Журналісты праверылі гэты "пашпарт" з дапамогай "Белпола": твары на здымках ідэнтычныя, а на імя Макавеева не зарэгістраваныя ні тэлефоны, ні якая-небудзь маёмасць у Беларусі.
"Кіберпартызаны" пацвердзілі Еўрарадыё, што дакумент, згаданы ў матэрыяле, існуе ў пашпартнай базе.
Сама журналістка ў сацсетках паведаміла, што чуе пра гэты пашпарт з 2023 года, але ніколі яго не бачыла. Звесткі пра гэты дакумент Сямашка тлумачыць кампаніяй супраць яе, развязанай з асабістай антыпатыі.
