У мужа беларускай журналісткі-эмігранткі знайшлі "пашпарт прыкрыцця" — СМІ

У беларускай медыясферы разгараецца чарговы шпіёнскі скандал.

Журналісты "Нашай Нівы" знайшлі пашпарт прыкрыцця ў мужа вядомай журналісткі, якая ў 2020-м звольнілася з дзяржаўнага радыё, узначальвала беларускую рэдакцыю польскага радыё Wnet і займалася аўдытам Марафону салідарнасці з палітвязнамі.

Гаворка пра супрацоўніка кампаніі Wargaming Фёдара Гарбачова. Разам з жонкай Вольгай Сямашка ён сёння жыве ў Літве. У 2018-м Гарбачоў атрымаў пашпарт аператыўнага прыкрыцця на імя Віктара Макавеева, сцвярджаюць журналісты "НН". Гэты дакумент яны праверылі з дапамогай "Белпол". твары на пашпартах ідэнтычныя, а на імя Макавеева не зарэгістраваныя ні тэлефоны, ні якая-небудзь маёмасць у беларусі.

У каментары выданню Гарбачоў адмаўляе, што мае яшчэ адзін пашпарт для агентурнай дзейнасці.

"НН" сцвярджае, што "Байпол" выявіў пашпарт на імя Макаеева яшчэ ў 2023 годзе і паведаміў пра гэта ў Офіс Ціханоўскай, але далей справа заглухла. 

"Мы не правяраем усіх, хто ідзе ў дэмакратычны рух ці незалежныя медыя — гэта задача кіраўнікоў гэтых арганізацый. Калі ўзнікаюць сумневы, то ўсе сёння ведаюць, што любога можна праверыць па базах. Чаму яе і яе акружэнне не правяралі тыя арганізацыі, куды яна ішла? Я не ведаю. А са свайго боку, атрымаўшы гэтую інфармацыю ў 2023-м, я высновы зрабіў: у нас яна не працавала, перасячэнняў не было. Таксама я праінфармаваў некаторых партнёраў аб гэтай інфармацыі", — пракаментаваў выданню старшы дарадца Ціханоўскай Франак Вячорка.

Вольга Сямашка адмаўляе, што ў яе мужа ёсць аператыўны пашпарт прыкрыцця.