Дырэктарка фабрыкі "Слодыч" незаконна праслухоўвала падначаленых

Упраўленне Следчага камітэта па Мінску расследуе крымінальную справу, пачатую Камітэтам дзяржбяспекі. Абвінавачанымі па справе праходзяць службовыя асобы адной з камерцыйных фірмаў. Іх вінавацяць у незаконным вырабе і збыце спецыяльных тэхнічных сродкаў, прызначаных для сакрэтнага атрымання інфармацыі, паведамляе interfax.by.

Падчас расследавання выявілася, што дырэктарка фабрыкі "Слодыч" распарадзілася набыць у гэтай фірмы спецыяльнае падслухвальнае і гуказапісвальнае абсталяванне за кошт прадпрыемства і ўсталяваць яго ў службовых памяшканнях.

Дзеянні дырэктаркі кандытарскай фабрыкі расцэненыя як злоўжыванне службовымі паўнамоцтвамі ў асабістых інтарэсах, з прычыненнем прадпрыемству шкоды ў асабліва буйным памеры — больш за 202 мільёны рублёў.

Таксама, кажуць прадстаўнікі Следчага камітэта, дырэктарка прычыніла шкоду "правам і законным інтарэсам грамадзян шляхам парушэння таямніцы тэлефонных перамоваў і іншых спосабаў зносін, з выкарыстаннем спецыяльных сродкаў".

Дарэчы, сёлета ў сакавіку Таццяну Селіх адзначылі званнем "Жанчына года" ў намінацыі "За прафесіяналізм".

Фота — bus.znate.ru