Дакументацыі на пабудову беларускага порта ў Мурманскай вобласці яшчэ няма
Мурманск, ілюстрацыйнае фота / ria.ru
Інвестыцыйная дэкларацыя па беларускім порце ў Мурманскай вобласці яшчэ не паступала. А праектную дакументацыю па ім плануецца падрыхтаваць толькі да канца 2026 года. Пра гэта расійскім СМІ паведаміў кіраўнік Расмаррэчфлота Андрэй Тарасенка.
Ён дадаў, што дагэтуль працягваецца абмеркаванне размяшчэння порта і робяцца разлікі. "Сярод магчымых варыянтаў размяшчэння новага порта можа быць Далёкі Усход, Санкт-Пецярбург, разглядаецца магчымасць рачной перавозкі", — прыводзіць словы расійскага чыноўніка выданне "Белорусы и рынок".
Між тым для гэтага праекта яшчэ летась была створаная кампанія "Марскі тэрмінал "Портарктык". Яе бенефіцыярам называюць Мікалая Вараб'я — аднаго з "гаманцоў Лукашэнкі".
Меркавалася, што беларускі порт у Мурманску пачне дзейнічаць ужо ў 2028 годзе. Праз яго планавалася пастаўляць беларускі экспарт на новыя рынкі пасля таго, як для Беларусі ў выніку санкцый былі закрытыя парты краін Балтыі.
