Чупрыс расказала, як праз акт падвісаў камп'ютар у Адміністрацыі Лукашэнкі

Вольга Чупрыс расказала, як праз прававы акт падвісаў камп'ютар у Адміністрацыі Лукашэнкі. Некаторыя дакументы, якія спрабавалі вывучыць, налічвалі амаль да тысячы старонак.

Намесніца кіраўніка Адміністрацыі паведаміла пра вынікі "маштабнай рэвізіі заканадаўства", якая праводзілася з лета мінулага года на даручэнне Аляксандра Лукашэнкі. Урад штогод прымае каля 900 прававых актаў, а розныя ведамствы — каля 1500. Падчас праверкі былі выяўленыя "недахопы, няўзгодненасці, супярэчнасці і зарэгуляванасць". Высветлілася, што тысяча актаў "фактычна ўжо страцілі сваю сілу", амаль паўтысячы "мелі патрэбу ў актуалізацыі", бо не адпавядаюць цяперашняму заканадаўству. А асобныя акты "прымаліся ў парушэнне кампетэнцый". Каля 400 актаў супярэчаць адзін аднаму.

Камісія выявіла дакументы аб'ёмам звыш 100 старонак. А былі акты пад тысячу старонак! "Гэта значыць, гэта не тое што цяжкарэалізаваныя, гэта нечытэльныя прававыя акты, — абураецца Чупрыс. — Калі мы іх спрабавалі выгрузіць у Word з прававой базы, то камп'ютар падвісаў".

Найбольш пытанняў да адукацыі, аховы здароўя, культуры, транспартнікаў. Прадказальна менш за ўсё нараканняў у камісіі Адміністрацыі да сілавікоў.

Было прынята рашэнне стварыць адзіны рэестр лічбавых паказчыкаў, каб некаторыя міністэрствы (напрыклад, МАРГ, Мінэканомікі) актамі па пытаннях цэнаўтварэння "не загрувашчвалі наш прававы масіў". У яго можна будзе ўвайсці і паглядзець лічбавыя паказчыкі за той ці іншы перыяд.

А яшчэ камісія Вольгі Чупрыс зрабіла "нечаканае адкрыццё": аказалася, што некаторыя міністэрствы "злоўжываюць сваімі кампетэнцыямі". "Міністэрства аховы здароўя злоўжывае прадастаўленым яму правам на выданне актаў і ў разрэз з дэкрэтам прэзідэнта аб развіцці прадпрымальніцтва прымае акты па санітарных нормах, якія загадана прымаць Савету Міністраў", — цытуе словы Чупрыс БЕЛТА.

Усе матэрыялы накіравалі ва ўрад. Ужо падрыхтавана пастанова, якім прызнаюцца страціўшымі сілу 1500 нарматыўна-прававых актаў.