Будучых ваенрукоў будуць браць у ВНУ без іспытаў
Ваенрук на занятках у школе, ілюстрацыйнае фота / Zerkalo.io
У Беларусі павялічылася колькасць спецыяльнасцяў у ВНУ, на якія абітурыентаў будуць прымаць без уступных іспытаў. У гэты пералік уключылі спецыяльнасць "Фізічная культура. Вайскова-патрыятычнае выхаванне". Адпаведная пастанова Міністэрства адукацыі была апублікаваная на Нацыянальным прававым партале.
Дакумент набыў юрыдычную моц з 19 лютага 2026 года.
Цяпер абітурыенты могуць паступаць без іспытаў на 23 спецыяльнасці. У іх ліку дашкольная адукацыя, гісторыя, музейная справа і ахова гісторыка-культурнай спадчыны, інжынерна-педагагічная дзейнасць, спецыяльная і інклюзіўная адукацыя ды іншыя.
Для залічэння без іспытаў абітурыенту неабходна мець атэстат аб агульнай сярэдняй адукацыі ці дыплом аб сярэдняй спецыяльнай адукацыі і мэтавае накіраванне.
Таксама без іспытаў на гэтыя спецыяльнасці могуць паступіць выпускнікі школ і вучэльняў, якія маюць медалі або дыпломы з адзнакай, і пераможцы рэспубліканскай алімпіяды па прадметах, па якіх трэба здаваць іспыт для навучання ў ВНУ.
