Брытанскую разведку МІ6 упершыню ўзначаліць жанчына
Блейз Метрэвелі / MI6
Брытанскую знешнюю разведку МІ-6 упершыню ўзначаліць жанчына — 47-гадовая Блейз Метрэвелі. Пра яе прызначэнне ў нядзелю абвясціла прэс-служба брытанскага ўрада, перадае Бі-Бі-Сі.
Ужо ўвосень Метрэвелі заменіць на гэтай пасадзе цяперашняга кіраўніка MI6 Рычарда Мура.
Метрэвелі паступіла на службу ў разведку ў 1999 годзе, калі была студэнткай Кембрыджа. Цяпер яна ўваходзіць у кіраўніцтва разведкі і ўзначальвае ў MI6 аддзел тэхналогій і інавацый. Раней яна займала розныя кіраўнічыя пасады ў службе контрразведкі — MI5.
MI6 займаецца зборам інфармацыі за мяжой, супрацьдзеяннем варожым дзяржавам і барацьбой з тэрарызмам.
Брытанскі прэм'ер Кір Стармер, які цяпер знаходзіцца ў Канадзе на саміце G7, сказаў, што прызначэнне адбываецца ў той час, калі краіна "сутыкаецца з пагрозамі беспрэцэдэнтнага маштабу".
